सिन्धुपाल्चोकको जुगल गाउँपालिका २ मा गएको पहिरोमा परी हराइरहेकाहरुको नेपाली सेनाले खोजी तथा उद्धार गरिरहेको छ । गत साउन ३० गते सिन्धुपाल्चोकको जुगल गाउँपालिकामा पहिरो जाँदा १९ जनाको मृत्यु भएको छ। पहिरोमा परी २० जना हराएका थिए । नेपाली सेनाको श्री गोरखबक्स गणको खोज तथा उद्धार टोलीले सशस्त्र प्रहरी बल नेपाल, नेपाल प्रहरी, स्थानीय वासिन्दालगायत अन्य निकायहरुको सहयोगमा हालसम्म चार महिला, तीन पुरुष, पाँच बालिका र सात बालकको शव फेला पारिसकेको हो । उक्त पहिरोमा नेपाली सेनाको एमआई १७ हेलिकप्टरले खाद्यान्न, लत्ता कपडा, पाल लगायत अत्यावश्यक राहत सामग्री ढुवानी गरी उक्त स्थानमा पुर्‍याएको छ । स्थानीय प्रशासन, सशस्त्र प्रहरी बल, नेपाल प्रहरी, स्थानीय वासिन्दालगायत अन्य निकायहरुसँग समन्वय र सहकार्य गरी नेपाली सेनाका ४७ जना खोज तथा उद्धार कार्यमा खट्टिइरहेको नेपाली सेनाको मुख्यालयले जनाएको छ ।